SABAH Tədris Mərkəzi işıqları söndürdü - QLOBAL EKOLOJİ HƏRƏKATA DƏSTƏK

"Yer saatı” kampaniyası Planetimiz üçün müsbət dəyişikliklər etmək məqsədilə yüz milyonlarla insanı ətrafına cəm edən qlobal ekoloji hərəkatdır. Kampaniyanın əsas hədəfi kütlənin gücündən yararlanaraq ətraf mühitə töhfə verməkdən ibarətdir.

İlk dəfə 2007-ci ildə Avstraliyanın Sidney şəhərində təşkil olunan aksiya zamanı 2.2 milyon şəhər sakini və 2,000-dən çox təşkilat qlobal iqlim dəyişikliyinə qarşı çıxaraq bir saatlıq işıqları söndürdülər. Artıq bir ildən sonra Earth Hour 35 ölkədə 50 milyondan artıq tərəfdaş toplayaraq qlobal hərəkata çevrildi.

Hər il, mart ayının son şənbə günü, yerli vaxtla saat 20:30-da Yer saatı kampaniyası çərçivəsində ənənəvi hal almış və bir şəhərin təşəbbüsü ilə başlayıb sonradan 178 ölkə və 7000-dən çox şəhəri özünə cəlb edərək qlobal bir hadisəyə çevrilmiş "işıqların söndürülməsi” saatı qeyd edilir.

Kampaniya, Azərbaycanda 2011-ci ildən etibarən qeyd olunur. Hər il kampaniya ölkəmizdə minlərlə insanın iştirakı ilə baş tutur, bir çox hökumət və özəl təşkilatlar tərəfindən dəstəklənir. Dünya Vəhşi Təbiət Fondunun "Yer saatı” beynəlxalq kampaniyasının Azərbaycan üzrə rəsmi koordinatoru IDEA İctimai Birliyidir.

Ötən illərdə olduğu kimi bu il də kampaniya çərçivəsində ölkəmizdə bir neçə kütləvi aksiya və tədbirlər keçirilib.Bu il "Yer saatı" aksiyası təkcə Bakıda deyil, Qəbələ, Şəmkir və Sumqayıtda da qeyd edilib.

Şəhərimizdə yerləşən SABAH Tədris Mərkəzi işıqlarını söndürməklə bu möhtəşəm ətraf mühit hərəkatına qoşulub.Mərkəz, bu addımla cəmiyyəti iqlim dəyişikliyi məsələlərinə daha həssas yanaşmağa səsləyir.

Qeyd edək ki, bu il aksiyaya Sumqayıt şəhərindən yeganə olaraq SABAH Tədris Mərkəzi qoşulub.

"Yenisumqayit.az"