Sumqayıtda hava

Manşet, Cəmiyyət

Zakir Fərəcov hesabat verdi - Ötən il Sumqayıtda hansı uğurlar əldə olunub?

Zakir Fərəcov hesabat verdi - Ötən il Sumqayıtda hansı uğurlar əldə olunub?

Sumqayıtda ümumi daxili məhsulun həcmi 30 faizdən çox artıb.

Fevralın 5-də Sumqayıtda 2017-ci ilin sosial-iqtisadi inkişafının yekunlarına və qarşıda duran vəzifələrə həsr olunmuş hesabat yığıncağı keçirilib.

Hesabat yığıncağında Şəhər İcra Hakimiyyətinin başçısı Zakir Fərəcov, Prezident Administrasiyasının məsul işçisi Vəfadar Bağırov, millət vəkilləri, idarə, müəssisə və təşkilat rəhbərləri, eləcə də şəhər ictimaiyyətinin nümayəndələri iştirak ediblər.

Öncə ötən ilin sosial-iqtisadi inkişafını, abadlıq-quruculuq işlərini əks etdirən film nümayiş olunub.

İcra Hakimiyyətinin başçısı Zakir Fərəcovun ötən ilin yekunlarına dair hesabat məruzəsi dinlənilib. Diqqətə çatdırılıb ki, Prezident İlham Əliyevin müəyyənləşdirdiyi inkişaf strategiyasının həyata keçirilməsi nəticəsində 2017-ci il Sumqayıt üçün də uğurlu olub. 2016-cı illə müqayisədə 2017-ci ildə ümumdaxili məhsulun həcmi 30,2 faiz artaraq 1 milyard 533 milyon manatdan çox olub. Onun bir nəfərə düşən həcmi 4489 manat təşkil edib ki, bu da 2016-cı ilə nisbətən 32,4 faiz çoxdur. Ötən illə müqayisədə sənaye müəssisələrində məhsul istehsalı 34,0 faiz artaraq 1 milyard 81 milyon manat təşkil edib. Ümumdaxili məhsulun tərkibində qeyri-dövlət sektorunun payı 85,0 faizdən çox olub. Vurğulanıb ki, əsas kapitala investisiya qoyuluşu tikinti-quruculuq işlərinin genişləndirilməsinə, şəhərin tarazlı inkişafına mühüm təsir göstərir. Bütün maliyyə mənbələri hesabına ayrı-ayrı sahələrin inkişafına 410 milyon manat vəsait yönəldilib, artım tempi 16,8 faiz təşkil edib. Kapital qoyuluşunun 73,4 faizi bilavasitə tikinti-quraşdırma işlərinin yerinə yetirilməsinə yönəldilib. 2017-ci ildə tikinti-quraşdırma işlərinin həcmi 12,0 faiz artıb. Bildirilib ki, ötən il Kimya Sənaye Parkında illik istehsal gücü 30 min ton olan süni sürtkü yağları, istehsal gücü 30 min ədəd olan yüksək təzyiqədavamlı birləşdiricilərin istehsalı, 145 çeşiddə quru formada 13 min ton, maye halında 57 min ton istehsal gücünə malik pestisidlər zavodu, müxtəlif tipli informasiyaların emalı, saxlanılması və ötürülməsi, informasiyanın təhlükəsizliyinin təmin olunması xidməti göstərən Data Mərkəz, 67 mVt gücündə yarımstansiya istifadəyə verilib. Həyata keçirilən tədbirlər nəticəsində 6901 yeni iş yeri açılıb. Bu da 2016-cı illə müqayisədə 12 faiz çoxdur.

Şəhər ərazisində fəaliyyət göstərən ticarət və iaşə obyektləri üzrə pərakəndə əmtəə dövriyəsinin həcmi əvvəlki ilə nisbətən 31,0 faiz artaraq 933 milyon manat olub. İqtisadiyyatın başqa sahələrində olduğu kimi əhalinin həyat səviyyəsini xarakterizə edən əsas göstəricilərdən biri olan pullu xidmətin həcmi xeyli çoxalıb. Əhali 274 milyon manatlıq pullu xidmətdən istifadə edib, ötən illə müqayisədə 34,7 faiz artım əldə olunub.

Z.Fərəcov qeyd edib ki, dekabr ayının 15-də ölkə Prezident İlham Əliyevin Sumqayıt şəhərinə səfəri və səfər çərçivəsində şəhərin sosial-iqtisadi və mədəni inkişafında böyük əhəmiyyəti olan Bayraq Muzeyi və "Yeni Azərbaycan Partiyası”nın Sumqayıt şəhər təşkilatı üçün tikilmiş yeni inzibati binalar, "Kimya Sənaye Parkında” dörd yeni istehsal sahəsinin açılışı və üç müəssisənin təməlinin qoyulması, "Kimyaçı” Mədəniyyət Sarayında, Səməd Vurğun və Koroğlu küçələrində, Lüdviqshafen parkında və "Azərboru” ASC-nin Boruyayma istehsalat sahəsində aparılan yenidənqurma və əsaslı təmir işləri ilə tanışlığı, şəhər ictimaiyyəti ilə keçirilən səmimi görüşü, şəhərin sosial-iqtisadi, mədəni inkişafında xidmətləri olan 40 nəfərin fəxri adlarla, diplom, orden və medallarla təltif edilməsi haqqında imzaladığı sərəncam hər bir sumqayıtlının xatirəsində silinməz iz qoyub. Bu səfər bir daha təsdiqlədi ki, Prezident cənab İlham Əliyev ulu öndər Heydər Əliyevin ənənəsinə sadiq qalaraq şəhərimizin sosial-iqtisadi inkişafını, əhalinin qayğılarının həllini daim diqqət mərkəzində saxlayır.

Sumqayıt şəhərində məskunlaşmış məcburi köçkünlər üçün 12-ci mikrorayonda 936 mənzildən ibarət yaşayış binalarının tikintisinə 2,8 hektar torpaq sahəsi ayrılıb. Hazırda həmin ərazidə evlərin tikintisi davam etdirilir. Şəhərin müasir yol-nəqliyyat sisteminin qurulması diqqət mərkəzində saxlanılıb. İlin əvvəlindən Metallurq, Sülh küçəsindən başlayaraq sənaye zonasından keçməklə Bakı-Quba magistralına qədər 4 kilometr uzunluğunda yol yenidən əsaslı şəkildə təmir olunur, yolun hərəkət hissəsi genişləndirilir. Həmin küçədə "Acı dərə” kanalının məcrasının dəyişdirilməsi ilə əlaqədar yeni su ötürücü kanalizasiya xətti çəkilir. Bir neçə küçədə avtomobil yoluna yeni asfalt örtüyü salınıb. Şəhərdə 450 yaşayış binasının üstü yüksək keyfiyyətli metal kirəmitlə örtülüb. Həmçinin ötən ilin noyabr ayından növbəti 100 binanın dam örtüyünün dəyişdirilməsinə başlanılıb. Bu işlərin cari ilin birinci rübün sonunadək başa çatdırması nəzərdə tutulub. "Lift Servis” Birliyi tərəfindən şəhərin mənzil fonduna aid hündür mərtəbəli binalarda istismar müddətini ötmüş liftləri dəyişmək üçün 105 lift alınaraq şəhərə gətirilib.

Prezident Administrasiyasının məsul işçisi Vəfadar Bağırov son 14 il ərzində regionların sosial-iqtisadi inkişafı sahəsində görülmüş işlərdən, Azərbaycanın daxili və xarici siyasətdə əldə etdiyi uğurlardan danışıb. Natiq qeyd edib ki, son illərdə ölkəmizin hər yerində olduğu kimi, Sumqayıt şəhəri də yeni inkişaf mərhələsini yaşayır. Regionların sosial-iqtisadi inkişafına böyük diqqət yetirən dövlət başçısının hərtərəfli qayğısı sayəsində şəhərdə əsaslı və kompleks yenidənqurma işləri görülüb.

Daha sonra məruzə ətrafında geniş fikir mübadiləsi aparılıb, çıxışlar dinlənilib. Çıxışlarda 2017-ci ildə görülən işlər təhlil edilib, uğurlarla yanaşı, problemlər də sadalanıb, onların həlli ilə bağlı təkliflər irəli sürülüb.

Sonda yığıncaq iştirakçıları adından Prezident İlham Əliyevə müraciət qəbul olunub.

Hesabat yığıncağından sonra yeni istifadəyə verilmiş Kimyaçı Mədəniyyət sarayında tanınmış incəsənət ustalarının iştirakı ilə konsert proqramı keçirilib.

sumqayitxeber.com





Ən son və doğru xəbərlər

Xəbər lenti

Təqvim

«    Oktyabr 2018    »
BeÇaÇCaCŞB
1234567
891011121314
15161718192021
22232425262728
293031 

KATEQORIYALAR