Sumqayıtlı idmançı: “Prezidentə bayram hədiyyəsi edəcəm" - FOTO

"Bakı-2015" I Avropa Oyunları çərçivəsində bu gün tatamiyə Azərbaycanın son məşəldarı, cüdoçu İlham Zəkiyev çıxacaq.
2 dəfə paralimpiya oyunları çempionu, 2 dəfə dünya çempionu, 5 dəfə Avropa çempionu, əməkdar idman ustası, "Şöhrət" ordeni, "Tərəqqi" medalı, "Heydər Əliyev" Fondunun təsis etdiyi Beynəlxalq "Qızıl çinar" mükafatları laureatı İlham Zəkiyev deyir ki, bu gün onun üçün 3 qat sevincli gündür.

İ.Zəkiyev rəqibilə günorta saatlarında münasibətlərə aydınlıq gətirəcək. Onun rəqibi isə I görüşdə qarşılaşacaq yunan və türk pəhləvanlarından biri olacaq.
Onun sözlərinə görə, zədəli olsa da, bu ona mane olmayacaq. "Bu görüşdən mütləq qalib ayrılacağam".

Zəkiyevlə yanaşı Zakir Mislimov da mübarizəyə başlayacaq. Birinci görüşdə onun rəqibi Ukraynalı idmançı olacaq. Əgər həmin görüşdən qalib ayrılarsa, idmançı növbəti dəfə tatamiyə çıxacaq. Onun rəqibi isə fransız və rus idmançılarının mübarizəsindən qalib ayrılan pəhləvan olacaq.
"Bu yarışa çox ciddi hazırlaşmışam. Yüksək əhval-ruhiyədəyəm. İnanıram ki, qızıl medal qazanacağam”, - deyə Zakir Mislimov bildirib.
Qeyd edək ki, Zakir Mislimov Avropa oyunlarının gümüş mükafatçısıdır.