Mən fəxr edirəm ki, azərbaycanlıyam!

Dekabrın 27-də Dünya Azərbaycanlılarının Həmrəyliyi Günü münasibətilə Sumqayıtda şəhər İH, Gənclər və idman baş idarəsinin birgə təşkilatçılığı ilə “Mən fəxr edirəm ki, azərbaycanlıyam” mövzusunda “dəyirmi masa” keçirilib.

Heydər Əliyev Mərkəzində keçirilən mərasimi giriş sözü ilə açan Sumqayıt Şəhər İH başçısının müavini Elgin Həbubullayev həmrəylik günü və Yeni il münasibətilə tədbir iştirakçılarını təbrik edib. Bildirib ki, bu günü bizə Ulu Öndərimiz bəxş edib.

Diqqətə çatdırılıb ki, 31 dekabr milli birlik şüarının simvoludur. Bu bayram ayrı-ayrı ölkələrdə yaşayan azərbaycanlılarla əlaqələr qurmaq, onlar arasında birlik və həmrəylik yaratmaq işində mühüm rol oynayır.

Şəhər Gənclər və idman baş idarəsinin rəisi Elşən Baxşəliyev vurğulayıb ki, Dünya Azərbaycanlılarının Həmrəyliyi Gününün qeyd edilməsi bütün dünya azərbaycanlıları tərəfindən artıq bir zərurətə və mənəvi ehtiyaca çevrilib. Qeyd olunub ki, dünya azərbaycanlılarını uca amalları uğrunda mübarizədə vahid yumruq kimi görmək istəyən Ümummilli Liderimiz soydaşlarımıza dünyanın hansı ölkəsində yaşamasından asılı olmayaraq hər zaman tarixi vətənlərinə sədaqətlə xidmət etməyi tövsiyə edib.


(AzərTAc)