“Azərikimya”dan növbəti xeyirxah addım - 250 nəfər qan verdi

Dekabrın 3-də SOCAR-ın "Azərikimya” İstehsalat Birliyində "Hemofiliya və talasse-miyadan əziyyət çəkən uşaqlara qayğı” Dövlət Proqramı çərçivəsində talassemiyalı xəstələr üçün 2010-cu ildən bəri davamlı olaraq keçirilən növbəti qanvermə aksiyasıva start verilmişdir.

Birliyin Mətbuat Xidmətindən "Yenisumqayit.az"a verilən məlumata görə "Azərikimya” İB-nin dəvəti ilə Səhiyyə Nazirliyinin B.Eyvazov adına Elmi Tədqiqat Hematologiya və Transfuziologiya İnstitutunun Mərkəzi Qan Bankı tərəfindən ezam olunmuş 12 nəfərlik xüsusi tibb briqadası tərəfindən aparılan və iki gün davam edən qanvermə aksiyasının ilk günündə Birliyin Etilen-polieti-len zavodundan müraciət etmiş 300-ə yaxın kimyaçı müayinə edildikdən və yerindəcə təşkil olunmuş səyyar laboratoriyada yoxlanıldıqdan sonra onların 120 nəfərindən qan götürülmüşdür.

Aksiyanın ikinci günündə isə Təmir-tikinti İdarəsinin və "Azərikimya” İB-nin baş ofisinin əməkdaşları minlərlə insan üçün həyati əhəmiyyət kəsb edən bu könüllü hümanitar aksiyada iştirak etmiş və 100 nəfərdən artıq işçi qan vermişdir. Bununla da iki gün ərzində "Azərikimya” İB üzrə 250 nəfərə yaxın kimyaçı bu xeyirxah aksiyada iştirak edərək, talassemiyalı xəstələr üçün qan vermişdir.