Sumqayıt dindarları Xocalı soyqırımının qurbanlarını anıblar

Fevralın 24-də Sumqayıt "Cümə” məscidində Xocalı soyqırımına həsr edilən tədbir keçirilib.Qafqaz Müsəlmanları İdarəsinin İctimaiyyətlə əlaqələr və ailə məsələləri şöbəsinin məlumatına görə, tədbirdə şəhər dindarları, Sumqayıt "Cümə” məscidi dini icması üzvləri, Xocalı sakinləri, habelə Sumqayıtda fəaliyyət göstərən ənənəvi dini konfessiya rəhbərləri iştirak ediblər. Öncə Bakı İslam Universitetinin müəllimi Əli Şərbətov çıxış edərək Xocalı soyqırımı haqqında qısa arayış verib.Qurani-Kərimin tilavətindən sonra Qafqaz Müsəlmanları İdarəsinin Şimal bölgəsi üzrə qazısı, Sumqayıt "Cümə” məscidinin axundu Hacı Rauf Sərdarov çıxış edərək, Xocalı soyqırımının tariximizdəki yeri, soyqırım həqiqətlərinin beynəlxalq səviyyədə təbliği, İslam dinində insanlara zülm edilməsinin qəbuledilməz olduğunu vurğulayıb:"Həqiqətən də Allah-Təala üçün bir insanın dəyəri bütün kainatın dəyərinə bərabərdir. Yəni, Uca Yaradanın nəzərində ən mükəmməl varlıq kimi yaratdığı insan və ona verdiyi həyat çox dəyərlidir və toxunulmazdır. Mütəal Allah Qurani-Kərimin "Maidə” surəsinin 32-ci ayəsində buyurur ki: "...hər kəs bir kimsəni öldürməmiş (bununla da özündən qisas alınmağa yer qoymamış) və Yer üzündə fitnə-fəsad törətməmiş bir şəxsi öldürsə, o, bütün insanları öldürmüş kimi olur...”.Düşünürük ki, erməni terrorçuları bütün insanlığı öldürmüşdür."Şəhər İcra Hakimiyyətinin rəsmisi Fərman Kərimov çıxış edərək, erməni vandalları tərəfindən Azərbaycan xalqına qarşı törədilmiş tarixi cinayətlərdən söz açıb, soyqırım ilə bağlı məqamlara aydınlıq gətirib.Xocalı faciəsindən bəhs edən videoçarxın nümayişindən sonra Sumqayıt Şəhər Əmək, BVM və Silahlı Qüvvələr Veteranları Birliyinin sədri Leyla Qasımzadə, Sumqayıt Şəhər Qarabağ Əlilləri Cəmiyyətinin sədri Tərlan Hacızadə, Sumqayıt Şəhər Bələdiyyəsinin nümayəndəsi Akif Kərimov, Dini Qurumlarla İş üzrə Dövlət Komitəsinin Sumqayıt bölgə şöbəsinin əməkdaşı Ülvi Məmmədov və digər natiqlər çıxış ediblər.Sonda iştirakçılara Sumqayıt "Cümə” məscidi tərəfindən hazırlanan və Xocalı faciəsindən bəhs edən bukletlər paylanıb, faciə qurbanlarının ruhuna fatihə və dua oxunub, ehsan süfrəsi açılıb."Yenisumqayit.az"