Şəhid Polkovnik “İlin adamı” seçildi - FOTOLAR

Mayın 5-də Qafqaz Universitetində ümummilli lider Heydər Əliyevin anadan olmasının 93-cü ildönümü münasibətilə ənənəvi VIII Beynəlxalq Gənclik və Multikulturalizm Festivalı keçirilib.

Festivalda "İlin adamı” nominasiyasının builki qalibi simvolik olaraq Azərbaycan əsgəri seçilib. "Sia.az"ın məlumatına görə, bu nominasiyada mükafat aprel döyüşlərində qəhrəmancasına şəhid olmuş polkovnik Vüqar Yusifovun övladı Aytən Yusifovaya təqdim edilib.

Pakistan, Tacikistan, İran, Koreya, Rusiya, Özbəkistan, Türkmənistan, ABŞ, Polşa, Meksika, Kolumbiya, Argentina, Hindistan, Banqladeş, Malayziya səfirliklərinin səfir və nümayəndələri, eləcə də bir çox dövlət və elm xadimlərinin də iştirak etdiyi Festival Azərbaycanın dövlət himninin səsləndirilməsi ilə başlayıb.

Universitetin rektoru, professor Ahmet Saniç çıxışı edərək bildirib ki, millətin ən önəmli sərvəti onun Vətənini sevən, bilikli, bacarıqlı mütəxəssislər kimi yetişən gəncləridir. Bu gün Prezident İlham Əliyevin uğurla həyata keçirdiyi siyasət xalqımızın rifahının yüksəldilməsinə xidmət edir.

Rektor şəhidlərimizin əziz xatirəsini ehtiramla yad edərək, onların qəhrəmanlığının hər bir gəncə örnək olduğunu bildirib.Tarix elmləri doktoru, Prezident yanında Dövlət İdarəçilik Akademiyasının professoru, "Simurq" Azərbaycan Mədəniyyət Assosiasiyasının prezidenti Fuad Məmmədov, ABŞ səfirliyinin nümayəndəsi xanım Emi Pitersen çıxış edərək, xalqımızın multikultural dəyərlərə verdiyi önəmi yüksək qiymətləndirib.

Universitetin özfəaliyyət dərnəklərinin çıxışları, xarici tələbələrin öz ölkələrinin milli mətbəx, geyim və digər mədəniyyət nümunələrini nümayiş etdirmələri maraqla qarşılanıb.

"Yenisumqayit.az"