Sumqayıt Texnologiyalar Parkında qaynaqçı işləyən gəncin UĞUR HEKAYƏSİ

Yeni tədris ilinin başlaması ilə əlaqədar olaraq Sənaye və İnnovasiyalar üzrə Bakı Dövlət Peşə Təhsil Mərkəzində təhsil almaq istəyən tələbələr üçün öncəki tədris ilinin məzunları təcrübələrini və tövsiyyələrini bölüşdülər. Ümid edirik ki, bu müzakirə zamanı alınan məlumatlar yeni təhsilalanlarımıza, eləcə də mərkəzimiz haqqında ətraflı məlumat əldə etmək istəyən insanlara öz istiqamətlərini düzgün seçmələrində kömək edəcək. Müsahiblərimizin siyahısından ilk olaraq suallarımızı Şəmsi Axundzadəyə yönləndirdik.
Şəmsi Sənaye və İnnovasiyalar üzrə Bakı Dövlət Peşə Təhsil Mərkəzinin “Sənayedə quraşdırma işləri üzrə usta” ixtisasının məzunu olduqdan sonra STP-Sumqayıt Texnologiyalar Parkında qaynaqçı vəzifəsində çalışır. Müsahibə zamanı Şəmsi qeyd etdiki, onun bizim mərkəzdə təhsil almasına səbəb işin çətinliyinə baxmayaraq qaynaqçı peşəsinə olan marağıdır.
    “Necə oldu ki, mərkəzdə təhsil almaq qərarına gəldiniz, bu seçimi edərkən gözləntiləriniz nədən ibarət idi və bu mərkəzin tələbəsi olmaq sizə nələr qazandırdı?”
    “Qaynaqçı vəzifəsinə olan marağım və bu sahədə özümü inkişaf etdirməyim üçün yeni axtarışlar etmək qərarına gəldim və mərkəzlə tanış oldum. Gözləntilərim isə praktiki tədrisə əsaslanan təhsil sistemiylə tanış olacağıma inanırdım, həqiqətən də belə oldu. Təchizatı yüksək səviyyədə olan laboratoriyaların olması və bizim bundan yararlana bilməyimiz çox sevindirici hal idi. Mərkəz mənə həm bilik və bacarıq, bununla yanaşı dünyagörüşü qazandırdı. Və hal-hazırda işlədiyim müəssisədə mənim digər təcrübəçilərdən hərtərəfli fərqlənməyimə kömək edir. Buna səbəb isə mən yalnız qaynaqçı kimi deyil, eləcə də mühəndislik haqqında bilik əldə etmişəm (güman edirəm gələcəkdə hətta mühəndis də ola bilərəm). Burada qaynağın müxtəlif növlərini öyrəndim, məsələn, layihə əsaslı yarımavtomat qaynağı, metal elektrod qövs qaynağı, volfram elektrod qaynağı və s. Peşə təhsil mərkəzi mənə SƏTƏM haqqında kifayət qədər bilik və bacarıq əldə etməyimə kömək olub və AutoCAD proqramı üzrə çalışmağı öyrəndim.”
      “Mərkəzimizdə təhsil aldıqdan sonra əldə etdiyiniz nəticə barəsində fikirlərinizi bizimlə bölüşmək istərdinizmi?”
     “Əlbəttə. Mən fəxr edirəm ki bu mərkəzin məzunu olmuşam və bu gün fərqləndiyimi hiss edirəm. Belə gözəl tədris mərkəzinin açılması gənc nəsil üçün peşə seçimi etməyə, bu peşəyə dərindən yiyələnməyə və düzgün istiqamətlənməyə dəstək verir. Hal-hazırda və təhsil aldığım müddətdə də məqsədim daim öyrənmək və öz sahəmi, eləcə də digər əlqəli sahələri öyrənmək və inkişaf etdirmək olub. Burada Koreya modeli əsasında hazırlanan təhsil proqramına uyğun dərslər tədris olunur, keçdiyimiz dərslər 60-70% praktiki məşğələlərə əsaslanır və hal-hazırki işimdə bu mənə çox kömək edir, artıq burada təcrübəyə başladıqda gördüyüm işlər mənə tanış idi, daha cəld və sərbəst işləyə bilirəm, bu da məni digər təcrübəçilərdən fərqləndirir.”
      “Digər peşə təhsili almaq istəyən şəxslərə tövsiyyəniz nə olardı?”
    “Digər təhsilalanlara tövsiyyəm odur ki, daim öyrənməyə meilli olsunlar, hazırda ölkədə həyata keçirilən iqtisadi inkişaf yeni iş yerləri yaradır və mütəxəssislərə ehtiyac duyulur. Bunu nəzərə alaraq peşə təhsilinə yiyələnən şəxslər bu imkandan istifadə etməlidirlər. Mən isə öz növbəmdə qaynaqçı kimi bu sahədə əlimdən gələni etməyə hazıram. Bunun üçün mərkəzdə kifayət qədər yeni texniki avadanlıq mövcuddur. Tövsiyyəm odur ki, təhsilalanlar mərkəzin bu avadanlıqlarından, laboratoriyalarından, ən əsası təlimçi heyətindən maksimum yararlansınlar.”