Faydalı

Qəflət və fürsət ayı yetişdi


Qəflət və fürsət ayı – Şaban
Ümmət imanın şirinliyini, Allaha yaxınlaşmanın ləzzətini hiss edib yaşasın deyə qızıl fürsətlərlə gəldi Şaban! Gəldi ki, namazda, orucda, xeyir əməllərdə müsəlmanlara şövq bəxş etsin, onları paklanma və ucalma məktəbinə – Ramazan məktəbinə hazırlasın... 
Allah qatında fəzilətli aydır Şaban...
Çünki Allahın elçisi Ramazandan sonra ən çox bu ayda oruc tutmuşdur... 
Çünki əməllər bu ayda Allaha göstərilər...
Çünki insanlar bu ayda qəflətə düşər...
Çünki bir başında “haram” aylardan Rəcəb, digər başında isə ayların sultanı Ramazan vardır... 
Çünki Ramazana qapı açan aydır...
Ramazana mənəvi coşqunluqla, rəbbani vəcdlə qədəm basmaq istəyənlər üçün hazırlıq fürsətidir Şaban...
Çünki Peyğəmbərin çox sevdiyi və orucla keçirdiyi aydır... 
Elə isə biz, müsəlmanlar Peyğəmbərin sevdiyini sevmək, onun Şaban ənənəsini yaşamaq və yaşatmaq, əməllərimizin Allah göstərildiyi bir vaxtda itaət, ixlas, təqva, zöhd və ibadət üzrə olmaq, cənnətin qapılarını döymək istəyiriksə...
Və...
Əməllərimiz ilahi dərgaha qaldırıldığında halımızdan utanmaq...
Qəflət burulğanında könlümüzün sıxılmasını, günah astanlarında unudulmasını...
Allahı zikrdə, namazları xatircəmliklə qılmada, sünnə ibadətlərini icrada,
Allah yolunda xərcləmədə yol verdiyimiz səhlənkarlıqdan utanmaq istəmiriksə...
Şa`ban fürsətini qaçırmayaq...
Tövbə edək, təmizlənək, Ramazanın ilahi feyzini pak könüllə hiss edib yaşayaq...
Hey dua edək... Allaha həm Şa`banı, həm də Ramazanı layiqi ilə keçməyimiz üçün əl açaq...
Şa`banda, heç olmazsa, bazara ertəsi və cümə axşamı günləri oruc tutub, Ramazana mənən və cismən hazırlaşaq...
Quran oxuyaq, Quran ayına könüllərimizdə, əməl və sözlərimizdə Allah kəlamı ilə qədəm basaq...
Gecələri ibadətə qalxaq, ilahi fürsət və imkanlardan faydalanaq...
Allahı zikr edək, səhər və axşam zikrlərini unutmayaq... Qoy dilimiz hər yerdə və hər zaman Onu xatırlayıb yada salsın...
Son olaraq...
Allahla münasibətlərimizdə yeni səhifə açıb, Ramazanımızı əvvəlki ramazanlardan fərqləndirmək, bir sözlə, bəlkə də, həyatımızdakı son fürsəti layiqincə dəyərləndirmək istəyiriksə, qəflətdən ayılıb, yorğun düşmüş könlümüzə nəzər salaq, Şabanı yaşayaq, Ramazana yetişək!
Elvüsal Məmmədov
İlahiyyatçı





Xəbər lenti

Təqvim

«    Aprel 2021    »
BeÇaÇCaCŞB
 1234
567891011
12131415161718
19202122232425
2627282930 

KATEQORIYALAR